Mae dyn sy’n cael ei ganmol am gael “effaith trawsnewidiol” ar ddatblygu sgiliau, lletygarwch a’r sectorau bwyd a diod yng Nghymru wedi cael ei gydnabod gyda Gwobr Cyflawniad Oes.
Cyflwynwyd y wobr i Arwyn Watkins, OBE, gan Gwmni Hyfforddiant Cambrian, un o brif ddarparwyr prentisiaethau y wlad. Cynhaliwyd y seremoni cyflwyno yng Ngwobrau Prentisiaethau, Cyflogwyr a Sgiliau blynyddol y cwmni yng Ngwesty’r Metropole, Llandrindod.
Arweiniodd Mr Watkins y rheolwyr i brynu’r cwmni ym 1995. Fel rheolwr gyfarwyddwr a chadeirydd gweithredol, tyfodd y busnes i fod yn un o ddarparwyr hyfforddiant uchaf ei barch yng Nghymru, sy’n adnabyddus am ragoriaeth, arloesedd a chynhwysiant.
Y llynedd, arweiniodd Cwmni Hyfforddiant Cambrian i gyfnod newydd fel Ymddiriedolaeth Perchnogaeth Gweithwyr ar ei benblwydd yn 30 oed ac mae bellach yn cynghorydd goruchwylio gweithredol i Grŵp Cwmnïau CHC. Mae’n dod a’i gyflogaeth gyda’r cwmni i ben ddiwedd mis Gorffennaf.
Mae’n ddatblygu i fod yn flwyddyn gofiadwy iddo. Fel llywydd Cymdeithas Goginiol Cymru (CAW), ef oedd y cogydd cyntaf o Gymru i ennill Aelodaeth Anrhydeddus am Oes WorldChefs yng Nghyngres ac Expo 2026, a gynhaliwyd yng Nghanolfan Gynadledda Ryngwladol Cymru (ICC Wales) mis diwethaf.
Arweiniodd Mr Watkins, sy’n byw yn Llanfair Caereinion, ger y Trallwng, y tîm a sicrhaodd y gyngres, digwyddiad coginiol mwyaf y byd, i Gymru. Dyma’r tro cyntaf i’r digwyddiad cael ei gynnal yn y DU yn ei hanes 98 mlynedd.
“Mae’r wobr hon yn gydnabod nid yn unig gyflawniad, ond oes o ddylanwad, arwain, gwasanaeth ac effaith,” meddai Faith O’Brien, a olynodd Arwyn fel rheolwr gyfarwyddwr.
“Heno, rydym yn anrhydeddu unigolyn y mae ei effaith ar ddatblygu sgiliau, lletygarwch a’r sectorau bwyd a diod yng Nghymru wedi bod yn gwbl drawsnewidiol. Mae gyrfa Arwyn wedi’i diffinio gan weledigaeth, ymroddiad, a chred ddiwyro ym mhotensial pobl.
“Yn arweinydd, mentor, hyrwyddwr prentisiaid, eiriolwr balch dros fwyd o Gymru ac yn was ymroddedig i’w gymuned, mae ei etifeddiaeth yn rhan annatod o hyfforddiant a lletygarwch Cymru a bydd ei ddylanwad yn parhau i lunio genedlaethau’r dyfodol am flynyddoedd lawer i ddod.”
Talodd teyrnged i’w gyfraniad i’r sector dysgu seiliedig ar waith ledled Cymru, trwy wasanaethu fel prif weithredwr ac yna’n gadeirydd Ffederasiwn Hyfforddiant Cenedlaethol Cymru rhwng 2008 a 2014.
Gweithiodd Mr Watkins yn agos gyda Llywodraeth Cymru a darparwyr hyfforddiant i lunio polisi cenedlaethol a chryfhau cyfleoedd i ddysgwyr a gwasanaethodd fel aelod o fwrdd Partneriaeth Dysgu a Sgiliau Rhanbarthol ar gyfer Gorllewin a Chanolbarth Cymru.
“I Arwyn, nid yw prentisiaethau erioed wedi bod yn gymwysterau yn unig,” ychwanegodd Faith. “Maen nhw’n gyfleoedd sy’n newid bywydau – llwybrau sy’n agor drysau, adeiladu hyder a chryfhau cymunedau. Mae ei gred mewn meithrin talent ar bob lefel wedi helpu miloedd o unigolion i gymryd eu camau cyntaf i yrfaoedd ystyrlon.”
Wrth ymateb, dywedodd Mr Watkins: “Pan fyddwch chi’n clywed rhywun yn siarad am eich bywyd fel ‘na, mae’n hynod emosiynol. Rwy’n falch o bopeth rydw i wedi’i gyflawni yn fy mywyd hyd yma, ond ni fyddai unrhyw beth wedi bod yn bosibl heb waith tîm.
“Mae’r cyfan wedi’i gyflawni trwy ddechrau fel prentis. Mae’n anrhydedd mawr i mi dderbyn y wobr hon ac rwy’n diolch i’r holl gydweithwyr yr wyf wedi gweithio gyda nhw yng Nghwmni Hyfforddiant Cambrian dros y 27 mlynedd diwethaf.”
Datgelodd fod sylw diystyriol gan athro pan oedd yn gadael yr ysgol wedi’i ysbrydoli. Wrth glywed bod Mr Watkins wedi dewis gyrfa fel cogydd, atebodd yr athro:
“You will be alright doing that because it doesn’t require any brains!”
Ym mhob arddangosiad coginio mae y mae wedi’i roi, mae’n sicrhau bod ganddo can o gwrw Brains fel cyfeiriad at y sylw.
“Rydw i mor hapus fy mod wedi dychwelyd i Gymru i reoli Cwmni Hyfforddiant Cambrian a wedi gallu cyflawni fy huchelgeisiau,” ychwanegodd. “Rwy’n gobeithio fy mod hefyd wedi helpu i gyflawni uchelgeisiau pobl rydw i wedi ymgysylltu â nhw.”
Derbyniodd Urdd yr Ymerodraeth Prydeinig yn 2018 am ei gyfraniad eithriadol i sgiliau, lletygarwch ac economi Cymru.
Yn fab i ffermwr o Lanwrtyd, gadawodd Ysgol Uwchradd Llanfair-ymmuallt i ymuno â’r Fyddin fel prentis cogydd ac mae wedi hyrwyddo bwyd o Gymru a sgiliau coginio trwy gydol ei fywyd.
Bu’n hyfforddi Tîm Coginio Iau Cymru i ennill medal aur yn yr Olympaidd Coginio yn 2004 ac mae wedi bod yn llywydd Cymdeithas Goginiol Cymru ers 2015.
O dan ei lywyddiaeth, cynhaliodd Cymru Gynhadledd Llywyddion Ewropeaidd WorldChefs yn 2017 wedi’i dilyn gan Cyngres ac Expo 2026, a fynychwyd gan fwy na 800 o gogyddion gorau o bob cwr o’r byd.
Trwy ei rwydwaith o bum swyddfa ledled Cymru, Cwmni Hyfforddiant Cambrian yw’r prif ddarparwr annibynnol o brentisiaeth i’r diwydiannau lletygarwch a gweithgynhyrchu bwyd a diod.
Mae’r cwmni a’i bartneriaid hefyd yn darparu prentisiaethau arwain a rheoli, manwerthu, gweinyddu busnes, gwasanaeth cwsmeriaid, rheoli adnoddau cynaliadwy, iechyd, gofal cymdeithasol a blynyddoedd cynnar, gwaith barbwr a thrin gwallt, a hamdden egnïol.
I gael rhagor o wybodaeth cysylltwch ag Alison Collingridge, rheolwr marchnata Cwmni Hyfforddiant Cambrian, ar Ffôn: 01938 555893 neu Duncan Foulkes, cynghorydd cysylltiadau cyhoeddus, ar Ffôn: 01686 650818.