Mae dau brentis a gefnogir drwy Raglen Prentisiaethau a Rennir â Chymorth Llywodraeth Cymru wedi dangos beth y gellir ei gyflawni gyda’r cyfleoedd cywir, gan symud ymlaen i swyddi maen nhw’n ei mwynhau ac yn ffynnu ynddynt.
Mae Amber Spellman, 26, o’r Rhyl, yn gweithio fel cynorthwyydd fferylliaeth yn Ysbyty Glan Clwyd, Bodelwyddan, ac mae Morgan Griffiths, 24, o Ben-y-bont ar Ogwr, yn cael ei gyflogi fel aelod o’r tîm cwsmeriaid yn siop Co-op ym Mracla.
Mae’r ddau wedi cwblhau eu Prentisiaethau a Rennir â Chymorth gyda Chwmni Hyfforddiant Cambrian, un o brif ddarparwyr dysgu seiliedig ar waith yng Nghymru.
“Yn Hyfforddiant Cambrian rydym wedi ymrwymo i sicrhau bod prentisiaethau a chyfleoedd dysgu seiliedig ar waith ar gael i bob unigolyn, yn enwedig y rhai sydd ag anghenion dysgu ychwanegol,” meddai Faith O’Brien, Rheolwr Gyfarwyddwr, Cwmni Hyfforddiant Cambrian.
“Mae ein Rhaglen Prentisiaethau a Rennir â Chymorth mewn partneriaeth ag Elite ac Agoriad Cyf wedi bod yn rhedeg ers bron i bedair blynedd ac wedi bod yn llwyddiant mawr
“Mae pedwar ar hugain o’n dysgwyr wedi cwblhau eu prentisiaethau ac wedi cael cyflogaeth neu wedi trosglwyddo i brentisiaethau llawn gyda darparwyr hyfforddiant a ariennir gan Lywodraeth Cymru.”
Ym mis Mehefin, ymunodd Amber a Morgan â mwy na 100 o brentisiaid y cwmni a raddiodd mewn seremoni a gynhaliwyd ar Faes Sioe Frenhinol, Llanelwedd.
Tynnodd y seremoni sylw at y cyfleoedd cynhwysol a chefnogol sydd ar gael drwy raglenni prentisiaethau ledled Cymru ac o fewn Cwmni Hyfforddiant Cambrian.
Cafodd Amber argraff fawr yn ei interniaeth gychwynnol yn Ysbyty Glan Clwyd gan ddod yn gynorthwyydd fferylliaeth llawn amser a chwblhau Prentisiaeth a Rennir â Chymorth Lefel 2 mewn Gwasanaeth Cwsmeriaid.
Mae hi bellach yn helpu i hyfforddi staff newydd yn y fferyllfa i ddefnyddio robot i ddidoli presgripsiynau.
“Rwy’n teimlo’n falch iawn am sicrhau swydd llawn amser a chwblhau fy mhrentisiaeth,” meddai Amber a rhoddodd diolch i hyfforddwr swyddi Agored Cymru, Nicola Jones, swyddog hyfforddiant Cwmni Hyfforddiant Cambrian, Gemma Wilkins, a’i rheolwr fferyllfa Alistair Fisher am eu cefnogaeth.
“Yn fy nghyfweliad swydd, dywedodd y tîm fferylliaeth fy mod wedi creu argraff arnyn nhw gan ba mor galed rwy’n gweithio – mae’r staff yn garedig iawn ac yn rhoi annibyniaeth i mi gyda’r tasgau rydw i’n eu gwneud. Fy uchelgais yw parhau i weithio’n galed, ennill profiad i helpu pobl newydd i ymuno â’r fferyllfa ac o bosibl ennill dyrchafiad yn y dyfodol.
“Mae’n rhaid i mi ddiolch i Gwmni Hyfforddiant Cambrian am fy helpu i gyrraedd lle rydw i nawr. Fy neges i bobl fel fi yw peidiwch byth â rhoi’r gorau iddi oherwydd mae llawer o gefnogaeth ar gael i’ch helpu chi i ddod o hyd i swydd.”
Dywedodd Gemma: “Rhoddodd Amber popeth i’w phrentisiaeth sydd wedi rhoi hwb i’w hyder a’i hannibyniaeth. Mae ei rheolwr, Alistair, wedi darparu cefnogaeth ac anogaeth wych ac fe wnaeth ei hargymell ar gyfer y swydd amser llawn.”
Dywedodd Mandy Hughes, uwch reolwr moderneiddio’r gweithlu Bwrdd Iechyd Prifysgol Betsi Cadwaladr, ar ran y tîm:
“Rydym wrth ein bodd ac yn falch o weld Amber yn cwblhau ei phrentisiaeth ac yn ffynnu mewn rôl barhaol yn y GIG.
“Mae hwn yn adlewyrchiad gwirioneddol o waith caled a phenderfyniad Amber i lwyddo ac rydym yn dymuno pob llwyddiant iddi yn ei dyfodol.”
Mae Morgan wedi cwblhau Prentisiaeth a Rennir â Chymorth Lefel 2 mewn Manwerthu ac mae’n gweithio 16 awr yn siop Co-op ym Mracla, lle mae’n boblogaidd gyda chwsmeriaid a chydweithwyr.
“Yn fy marn i, nid oes unrhyw swydd yn bwysicach na helpu cwsmer neu gydweithiwr arall,” meddai. “Mae gweithio yn y siop wedi bod yn brofiad gwych oherwydd rwy’n hoffi cawd’n brysur a chwrdd â phobl.
“Fe wnes i fwynhau gwneud fy mhrentisiaeth oherwydd fe wnaeth i mi sylweddoli bod llawer mwy i fanwerthu nag yr oeddwn i’n meddwl ac mae wedi fy helpu mewn nifer o ffyrdd, gan gynnwys edrych am arwyddion rhybuddio cynnyrch.
“Fy nghyngor i bobl eraill fel fi sy’n chwilio am swydd yw parhau i geisio profi eich hun. Byddwn yn sicr yn argymell prentisiaeth.”
Canmolodd Lindsay Robinson, rheolwr siop Co-op ym Mracla, y gefnogaeth a roddwyd i Morgan a hi ei hun gan y swyddog hyfforddiant, Christine Grayson, o Gwmni Hyfforddiant Cambrian.
“Mae Morgan yn wych – mae’n wych gyda chwsmeriaid ac yn awyddus i blesio drwy’r amser,” meddai. “Roedd ei ymroddiad i’w brentisiaeth yn anhygoel ac mae wedi ei wneud yn fwy hyderus a hamddenol.”
Ychwanegodd Christine: “Mae Morgan yn frwdfrydig iawn, yn gwrtais ac yn mynd allan o’i ffordd i helpu cwsmeriaid – mae’n aeddfed er ei fod yn ifanc ac roedd yn bleser gweithio gydag ef!
“Mae’n gwneud yr holl gylchdro stoc yn y siop ac oherwydd ei fanwl gywirdeb, nid yw’n colli unrhyw beth.”
Trwy ei rwydwaith o bum swyddfa ledled Cymru, Cwmni Hyfforddiant Cambrian yw’r prif ddarparwr annibynnol o brentisiaeth i’r diwydiannau lletygarwch a gweithgynhyrchu bwyd a diod.
Mae’r cwmni a’i bartneriaid hefyd yn darparu prentisiaethau arwain a rheoli, manwerthu, gweinyddu busnes, gwasanaeth cwsmeriaid, rheoli adnoddau cynaliadwy, iechyd, gofal cymdeithasol a blynyddoedd cynnar, gwaith barbwr a thrin gwallt, a hamdden egnïol.
Graddedigion Amber Spellman a Morgan Griffiths yn seremoni raddio prentisiaethau Cwmni Hyfforddiant Cambrian.
Ends
I gael rhagor o wybodaeth, cysylltwch ag Alison Collingridge, rheolwr marchnata Cwmni hyfforddiant Cambrian, ar Ffôn: 01938 555893 neu Duncan Foulkes, cynghorydd cysylltiadau cyhoeddus, ar Ffôn: 01686 650818.